गणेशोत्सवापूर्वी लोअर परेलचा पूल सुरू करण्यासाठी प्रशासनाच्या हालचाली सुरू

लोअर परळ (डिलाईल रोड) पूल धोकादायक झाल्यामुळे जुलै २०१८ मध्ये बंद करण्यात आला. विविध अडथळ्यांमुळे या पुलाचे काम रखडले आहे. लोअर परळ रेल्‍वे स्‍थानकाजवळ ना. म. जोशी मार्ग आणि गणपतराव कदम मार्गावर हा पूल बांधण्याचे काम सुरू आहे. लोअर परेल पुलाची पश्चिम दिशेची एक बाजू जूनमध्ये सुरू करण्यात आली होती. तेव्हा संपूर्ण पूल सुरू करण्यासाठी जुलैची मुदत देण्यात आली होती. मात्र ही मुदत हुकली. गणेशोत्सवाच्या काळात लोअर परेल, करीरोड, लालबाग या परिसरात भाविकांची प्रचंड गर्दी असते. त्यामुळे गणेशोत्सवापूर्वी हा पूल सुरू करावा अशी मागणी होऊ लागली होती. पूल विभागाने तशी तयारी सुरू केली होती. मात्र नंतर ही मुदतसुद्धा ऑक्टोबरपर्यंत वाढवण्यात आली होती. त्यामुळे स्थानिकांमध्ये संतापाचे वातावरण होते. त्यातच आता करीरोडकडे जाणारी बाजू गणेशोत्सवाआधी सुरू करण्यात येणार असल्याचे पूल विभागाचे म्हणणे आहे. पायाभूत सुविधा विभागाचे उपायुक्त उल्हास महाले यांनी याला दुजोरा दिला आहे.

रेल्वे आणि पालिका यांनी मिळून बांधलेला हा पूल आहे. रेल्वेच्या हद्दीतील ८५ मीटर लांबीचे बांधकाम करण्‍यासाठी मुंबई महानगरपालिकेले रेल्‍वेला निधी दिला आहे. या पुलावर ना. म. जोशी मार्गावरुन येणारे २ आणि गणपतराव कदम मार्गावरुन येणारा १ असे तिन्ही मिळून एकूण ६०० मीटर लांबीचे तीन पोहोच रस्‍त्‍यांचे बांधकाम महानगरपालिका करीत आहे. या कामासाठी पालिकेने १३८ कोटींचे कंत्राट दिले आहे. या पुलाची पश्चिमेकडील मार्गिका १ जूनपासून वाहनचालकांसाठी खुली झाली. त्यामुळे गेल्या किमान पाच वर्षांपासून रखडलेल्या या पुलाचा एक टप्पा पूर्ण झाला. मात्र पूर्वेकडील बाजू अद्याप सुरू न झाल्यामुळे संपूर्ण पुलाचा अद्यापही वापर करता येत नाही. संपूर्ण पूल सुरू होण्यास पालिका प्रशासनाने आधी जुलै अखेरपर्यंतची मुदत देण्यात आली होती. ही मुदत हुकल्यानंतर सप्टेंबरमध्ये हा पूल सुरू करण्याचे उद्दिष्ट्य ठेवण्यात आले आहे.

एप्रिलमध्ये हा पूल सुरू करण्याचे लक्ष्य ठेवण्यात आले होते. मात्र काँक्रिटीकरणासाठी लागणारी खडी उपलब्ध होऊ न शकल्यामुळे दोन आठवडे काम रखडले होते. तर त्याआधी ट्रँकरच्या संपामुळे पाण्याअभावी काम रखडले होते. त्यानंतर हा पूल मे २०२२ मध्ये सुरू होणार होता. मात्र विविध कारणांमुळे दोनदा मुदत वाढत गेली . नंतर १५ जूनची मुदत तिसऱ्या वेळी देण्यात आली. त्यानंतर या पुलासाठी जुलै अखेरीसची मुदत देण्यात आली होती. आता ती मुदत देखील उलटली असून सप्टेंबर अखेरपर्यंत हा पूर्ण पूल सुरू करण्यात येणार आहे. पावसामुळे या पुलाचे कॉंक्रिटीकरण करता आले नाही, त्यामुळे हे काम रखडल्याचे पालिका अधिकाऱ्यांचे म्हणणे आहे.