गोकुळ दूध महासंघाच्या सभास्थळी महाडिक गटाच्या कार्यकर्त्यांनी आक्रमक होत घातला गोंधळ

गोकुळ दूध महासंघाच्या निवडणुकीपासून या राजकीय सुंदोपसुंदीची कायमच चर्चा राहिली आहे. महासंघावर सतेज पाटील गटाचं वर्चस्व असून महाडिक गट विरोधात आहे. मात्र, “सतेज पाटलांना फक्त महाडिकांचे टँकर व ठेका या दोन गोष्टी सोडून गोकुळबद्दल फारसं काही माहिती नाही”, अशा प्रकारची टीका शौमिका महाडिक यांनी केली होती. त्यामुळे सर्वसाधारण सभेआधीच वातावरण तापलं होतं. सभेच्या निमित्ताने दोन्ही बाजूंनी स्वतंत्रपणे दौरे आयोजित करून सभासदांच्या भेटीगाठी घेण्याचा प्रयत्न केला.

दरम्यान, आज सर्वसाधारण सभा सुरू झाल्यानंतर महाडिक गटाचे कार्यकर्ते आक्रमक झाल्याचं दिसून आलं. या कार्यकर्त्यांनी सभास्थळी लावलेले बॅरिकेट्स तोडून आत जाण्याचा प्रयत्न केल्याचाही दावा करण्यात येत आहे. यासंदर्भात बोलताना शौमिका महाडिक यांनी महासंघातील सत्ताधारी सतेज पाटील गटावर गंभीर आरोप केले आहेत.

“आत असणारे निम्म्याहून अधिक सभासद बोगस आहेत. हे सभासद झेरॉक्स घेऊन आले आहेत. इथेच झेरॉक्स वाटण्यात आल्याचंही मला समजलंय. बाहेर थांबलेले अनेक खरे सभासद अजून आत गेलेले नाहीत. दोन किलोमीटरपर्यंत रांग लावलेली आहे. एका तासापासून हे लोक तिथे थांबलेले आहेत”, असं शौमिका महाडिक यांनी सभास्थळी माध्यमांना सांगितलं.

“अशा प्रकारे बॅरिकेट्स लावण्याची पद्धत नसते. याचा अर्थ खरे सभासद इथे येणं तुम्हाला नकोच होतं. म्हणून ही यंत्रणा लावली आहे. त्यांच्यासाठी कदाचित हाच खेळ असेल. ते कशाला घाबरलेच हेच कळेना झालंय. झेंडे, पाण्याच्या बाटल्या सभास्थळी न्यायचे नाहीत असा नियम काढलाय”, अशा शब्दांत शौमिका महाडिक यांनी सत्ताधारी गटावर हल्लाबोल केला.

दरम्यान, गोकुळ दूध महासंघाशी संबंधित दूधसंस्थांची संख्या मोठ्या प्रमाणावर वाढूनही दूध संकलन मात्र त्या प्रमाणात वाढलं नसल्याचा आरोप शौमिका महाडिक यांनी याआधी केला आहे. या संस्था बोगस असून बाहेरून दूधखरेदी करत संकलनाचा आकडा फुगवल्याचाही आरोप त्यांनी केला आहे.