नवी मुंबई : नवी मुंबईमधील डीपीएस तलावाजवळ गुरुवारी पाच फ्लेमिंगो मृतावस्थेत तर, सात जखमी अवस्थेत आढळले. फ्लेमिंगोसाठी अवश्यक असलेल खाद्य तसेच पाणथळ जागा मुबलक प्रमाणात असल्यामुळे फ्लेमिंगो येथे वास्तव्यासाठी येतात.दरम्यान, या परिसरात आठवडाभरात मृत फ्लेमिंगोची संख्या आठवर पोहोचली आहे. डीपीएस तलावाजवळ गुरुवारी सकाळी फेरफटका मारायला गेलेल्या स्थानिकांना मृत फ्लेमिंगो दिसले.स्थानिकांनी घटनेची माहिती वनविभागाला देताच घटनास्थळी येऊन विनविभागाने मृत फ्लेमिंगोना ताब्यात घेऊन पनवेल येथील मुंबई पशुवैद्यकीय महाविद्यालयात शवविच्छेदनासाठी पाठवले. दरम्यान, पर्यावरणासाठी काम करणाऱ्या नॅटकनेक्ट फाउंडेशनने मुख्यमंत्र्यांना पत्र लिहून या घटनेची चौकशी करण्याची तसेच नवी मुंबईतील जैवविविधते रक्षण करण्यासाठी योग्य पावले उचलण्याची विनंती केली आहे. मागील शुक्रवारी तीन फ्लेमिंगो मृत आणि एक जखमी अवस्थेत आढळून आले होते.
नवी मुंबईत सक्रीय असलेल्या पर्यावरणप्रेमींनी बॉम्बे नॅचरल हिस्ट्री सोसायटी आणि कांदळवन कक्ष यांना या प्रकरणाची चौकशी करण्यास सांगितले. दरम्यान, अतिरिक्त प्रधान मुख्य वनसंरक्षक व्ही एस रामाराव यांनी घडलेल्या घटनेचा अभ्यास करण्यासाठी आणि पुढील कारवाई करण्यासाठी एक पथक घटनास्थळी पाठवले जाईस असे सांगितले. सेव्ह फ्लेमिंगोज अँड मॅग्रोव्हज फोरमच्या रेखा सांखला यांनी डीपीएस तलावातील पाण्याचा प्रवाह पुन्हा सुरु करण्याची विनंती नवी मुंबई महानगरपालिका आणि सिडकोला केली आहे. कोरड्या पडलेल्या डीपीएस फ्लेमिंगो सरोवरात अन्न न मिळाल्याने पक्षी विचलित होत असण्याची शक्यता पक्षीप्रेमींनी वर्तवली आहे.
