वसई विरारमध्ये दीड दिवसांच्या गणपतीचे विसर्जन; नागरिकांचा कृत्रिम तलावाला प्रतिसाद

कृत्रिम तलावात विसर्जित केलेल्या मूर्ती ट्रकमधून दगड खाणींमध्ये असलेल्या तलावात विसर्जित करण्यात आल्या. पालिकेने विसर्जन स्थळावर चोख व्यवस्था ठेवली होती. याशिवाय विविध सोयीसुविधा उपलब्ध करून दिल्या होत्या. त्यामुळे भाविकांची कुठल्याही प्रकारची गैरसोय न होता शांततेच्या वातावरणात हे विसर्जन पार पडले. पालिका आयुक्त अनिलकुमार पवार यांच्या मार्गदर्शनाखाली सर्व अधिकारी आणि कर्मचारी वर्ग विसर्जनाच्या व्यवस्था बघत होते. गणपती बाप्पा मोरया, पुढच्या वर्षी लवकर या असा जयघोष करत व ढोल, ताशा, मृदंगाच्या गजराने सारी वसई विरार नगरी दुमदुमली होती. विसर्जनादरम्यान कुठल्याही प्रकारचा अनुचित प्रकार घडू नये यासाठी कडेकोट पोलीस बंदोबस्त ठेवण्यात आला होता व तसेच गाव तलावावर महापालिकेचे कर्मचारी व अग्निशमन दलाचे जवान सुरक्षारक्षक म्हणून ठेवण्यात आले होते. यावेळी हजारोच्या संख्येने गणेशाच्या मूर्तीचे विसर्जन करण्यात आले. यावेळी गणेश भक्तांनीही सहकार्य करीत विसर्जन सोहळा उत्साही वातावरणात पार पडला. मूर्ती तलावात विसर्जित केल्यामुळे होणारे प्रदूषण लक्षात घेता यावर्षी तलावात गणेश मूर्तींचे विसर्जन न करता विसर्जनासाठी कृत्रिम तलावांची निर्मिती केली होती. मात्र काही ठिकाणी आपली परंपरा जोपासत पारंपारिक पद्धतीने विसर्जन केले.