मरिन ड्राइव्ह किनारा मार्गचं सुशोभीकरण; मुंबई महापालिकेचा नवीन प्रकल्प

मुंबई : मुंबई सागरी किनारा मार्ग प्रकल्पात मरिन ड्राइव्ह प्रियदर्शनी ते वरळी सी फेस या पहिल्या टप्प्यातील एक किलोमीटरच्या भागात समुद्र किनाऱ्यालगत काँक्रीटचे १३ हजार ३०० नवीन टेट्रापॉड बसविण्यात येणार आहेत. किनारा मार्ग प्रकल्पात जुने टेट्रापॉड काढण्यात आले होते. सततच्या लाटांच्या माऱ्यामुळे जवळील इमारतींनाही होणारा धोका पाहता टेट्रापॉड काढण्यास स्थानिकांनी विरोध केला होता. आता नवीन टेट्रापॉड पावसाळ्यानंतर बसवण्यास सुरुवात होणार आहे.

किनारा मार्ग प्रकल्प हा प्रिन्सेस स्ट्रीट फ्लायओव्हर ते वांद्रे वरळी सी लिंकच्या वरळी टोकापर्यंत असा १०.५८ किलोमीटर लांबीचा आहे. सध्या या प्रकल्पाचे ७५ टक्के काम पूर्ण झाले आहे. यापैकी वरळी ते मरिन ड्राइव्ह असा पहिला टप्पा पूर्ण करण्यासाठी मुंबई महापालिकेने कंबर कसली आहे. पहिला टप्पा येत्या नोव्हेंबरपर्यंत पूर्ण करण्याचे पालिकेचे उद्दिष्ट आहे. ८ लाख ८० हजार क्युबिक मीटर म्हणजेच १ लाख ४० हजार ट्रक भरतील एवढा भराव या प्रकल्पासाठी टाकण्यात आला आहे.

किनारा मार्ग प्रकल्पात प्रत्येकी तीन मार्गिका अशा एकूण सहा मार्गिका असतील. या मार्गिकांसाठी मरिन ड्राइव्ह प्रियदर्शनी येथील जुन्या फूटपाथचा भाग वापरून त्याची रुंदी वाढवण्यात आली. नवीन मार्गिकांमुळे फूटपाथही पुन्हा नव्याने करण्याशिवाय पर्याय राहिला नाही. हा फूटपाथ साधारण एक किलोमीटरचा आहे. त्यामुळे या वाढीव कामांसाठी मरिन ड्राइव्ह प्रियदर्शनी येथे आत असलेले जुने टेट्रापॉडही काढावे लागले. मात्र हे काम करताना स्थानिकांकडून त्यावेळी विरोधही करण्यात आला होता. लाटांचा मारा आणि येणाऱ्या पाण्यामुळे समुद्र किनारा लगतच असलेल्या इमारतींनाही धोका पोहोचण्याची शक्यता वर्तवण्यात आली. त्यामुळे मुंबई महापालिकेने या प्रकल्पाचे काम करणाऱ्या कंपनीला नवीन टेट्रापॉड टाकण्याच्या सूचना केल्या होत्या.

एक किलोमीटरच्या फूटपाथच्या पट्ट्यात समुद्रालगतच १३ हजार ३०० टेट्रापॉड टाकण्यात येणार असल्याची माहिती मुंबई पालिकेतील एका वरिष्ठ अधिकाऱ्याने दिली. समुद्राच्या लाटा या टेट्रापॉडमुळे रोखल्या जातील आणि किनारा मार्ग प्रकल्पाला तसेच जवळील इमारतींना कोणताही धोका पोहोचणार नसल्याचे त्यांनी स्पष्ट केले.