पुण्यात भावाकडे पैसे मागत असल्याच्या रागातून विवाहितेने नवऱ्यावर ओतलं उकळतं पाणी

पुणे गुन्हेवार्ता : पती – पत्नीमधील वाद हे अनेक कुटुंबात नेहमीच आहे. पण पुण्यात पती-पत्नीच्या वादाची भयंकर घटना समोर आली आहे. मेव्हण्याला उसने दिलेले पैसे परत मागितल्याच्या रागातून पत्नीने तिच्या पतीवर गरम पाणी ओतल्याची घटना समोर आली आहे. या भयंकर घटनेत पती ५० टक्के भाजला असून गंभीर जखमी आहे. १३ जुलै रोजी पहाटे साडे तीनच्या दरम्यान ही घटना घडली आहे. पुण्यातल्या वारजे पोलीस ठाण्यात याप्रकरणी तक्रार दाखल करण्यात आली आहे. या प्रकरणी पुण्यातील शिवणे इथे राहणाऱ्या पती महादेव जाधव (वय ३०) यांनी वारजे पोलीस ठाण्यात फिर्याद दिली आहे. त्यानुसार पत्नीवर गुन्हा दाखल करण्यात आला आहे.

पोलिसांनी दिलेल्या माहितीनुसार, फिर्यादी आणि त्याची पत्नी हे दोघेही शिवणे भागात भाजीपाला विक्रीचं काम करतात. फिर्यादीने काही दिवसांपूर्वी त्याच्या मेव्हण्याला घर बांधण्यासाठी २ लाख ४० हजार रुपये उधारीवर दिले होते. फिर्यादी महादेव यांचा मेहुणा हे पैसे कित्येक दिवस परत देत नव्हता. त्यामुळे महादेव यांनी उधार दिलेले पैसे मेहुण्याकडे परत मागितले. महादेव यांनी अनेकदा मेहुण्याकडे पैसे मागितले होते.

पती आपल्या भावाकडे सतत पैसे मागत असल्याच्या रागातून महादेव आणि त्यांच्या पतीमध्ये वाद होत होते. आपला पती भावाकडे सतत पैसे मागत असल्याचा महिलेला राग होता. याच रागातून महिलेने पतीच्या अंगावर गरम पाणी ओतलं. घटनेच्या दिवशी १३ जुलै रोजी महादेव जाधव झोपलेले असताना त्यांच्या पत्नीने त्यांच्या अंगावर गरम उकळतं पाणी टाकलं. त्यात महादेव जाधव हे ५० टक्के भाजले गेले असून गंभीर जखमी झाले आहेत. पतीवर गरम पाणी ओतल्यानंतर पत्नीने घरातून पळ काढला. त्यानंतर महादेव यांनी घराजवळ राहाणाऱ्यांना याप्रकरणी माहिती दिली. सध्या त्यांच्यावर रुग्णालयात उपचार सुरू आहेत. याप्रकरणी पुढील तपास सहाय्यक पोलीस निरीक्षक रमेश बाबर करत आहेत.