रामनगर पोलीसांची कारवाई; सीसीटीव्हीच्या मदतीने अट्टल रिक्षाचोरांना केली अटक

ठाणे गुन्हे वार्ता : कल्याण डोंबिवली परिसरात दुचाकी चोरी सोबतच रिक्षा चोरीचं प्रमाणही वाढलं आहे. डोंबिवली पूर्वेकडील बंदिश हॉटेल परिसरात चोळेगाव तलावाच्या दिशेने एक रिक्षा पार्क करुन ठेवली होती. घराच्या परिसरात, रस्त्यावर उभी करुन ठेवलेली दुचाकी, रिक्षा रात्रीच्या वेळेत बनावट चावीने सुरू करुन चोरुन नेणाऱ्या दोन चोरट्यांना रामनगर पोलिसांनी अटक केली.

श्रीकांत शेडगे (४९, रा. पिसवली), विक्रम साळुंखे (४३, रा. विठ्ठलवाडी) अशी आरोपींची नावे आहेत. श्रीकांत तंत्रज्ञ, विक्रम रिक्षा चालक आहे. ठाकुर्ली चोळे गाव भागातून एका नागरिकाची रिक्षा रात्रीच्या वेळेत चोरीला गेली होती. रामनगर पोलीस ठाण्यात तक्रार दाखल झाल्यावर पोलिसांनी परिसरातील सीसीटीव्ही तपासून शोध सुरू केला. यावेळी दोन इसम रिक्षा चोरी करत असल्याचे पोलिसांना दिसले

पोलिसांनी दोन्ही चोरट्यांची ओळख पटवून त्यांचा शोध सुरू केला होता. शिळफाटा रस्त्यावरील पिसवली येथे एका भंगार दुकानात दोन जण रिक्षेचे सुट्टे भाग विक्रीसाठी येणार आहेत अशी माहिती रामनगर गुन्हे शोध पथकाचे साहाय्यक पोलीस निरीक्षक योगेश सानप, हवालदार नीलेश पाटील, प्रशांत सरनाईक यांना मिळाली होती. पोलिसांनी पिसवली भागात सापळा लावला होता. ठरल्या वेळेत दोन जण रिक्षेचे सुट्टे भाग घेऊन पिसवली भागात येताच पोलिसांनी त्यांना अटक केली. त्यांच्या चौकशीत त्यांना दारुचे व्यसन जडले होते. जवळील पैशातून दारु पिण्याची हौस भागत नव्हती. म्हणून ते चोरी करुन मिळेल ती वस्तू विकून दारू पिण्याची हौस भागवत होते.

तसेच या दोघांकडून एक रिक्षा आणि ९ मोटारसायकल हस्तगत करण्यात आल्या असून, या दोघांकडून ६ गुन्ह्यांचा उलगडा करण्यात आली आहे. सध्या पोलिसांनी आपला अधिक तपास सुरू केला असून, यात अजून गुन्हे उघडकीस येणार असल्याचे पोलीस अधिकारी सांगत आहे.