इंग्लंडकडून फक्त ३ वर्षांसाठी शिवरायांचे ‘वाघ नखं’ महाराष्ट्राला मिळणार

मुंबई : महाराष्ट्र शासनाच्या पुढाकाराने इंग्लंडमधील व्हिक्टोरिया आणि अल्बर्ट संग्रहालयातून छत्रपती शिवरायांचा ‘वाघ नखं’ आणण्याची तयारी सुरू आहे. वास्तविक २०२४ हा शिवरायांच्या राज्याभिषेकाचा ३५० वा वर्धापन दिन आहे. या वर्षाच्या अखेरीस ‘वाघ नखं’ भारतात आणले जातील, अशी अपेक्षा आहे. हे वाघ नखं राज्य सरकारला व्हिक्टोरिया आणि अल्बर्ट (व्हीअँडए) संग्रहालयाकडून तीन वर्षांसाठी दिले जाणार आहे. सांस्कृतिक कार्य विभागाने प्रसिद्ध केलेल्या जीआरमध्ये असे म्हटले आहे.

ही ‘वाघ नखं’ छत्रपती शिवाजी महाराज वास्तू संग्रहालय (CSMVS), सातारा येथील श्री छत्रपती शिवाजी महाराज वस्तुसंग्रहालय, नागपुरातील मध्यवर्ती संग्रहालय आणि कोल्हापुरातील लक्ष्मी विलास पॅलेस या चार वस्तुसंग्रहालयात प्रदर्शित केले जाणार आहे. ‘वाघ नखं’ परत आणण्यासाठी सुरक्षा आणि वाहतूक व्यवस्थेचे नियोजन करण्यासाठी राज्य सरकारने ११ सदस्यीय समिती स्थापन केली आहे. ही समिती वाघ नखाचे प्रदर्शन आणि राज्यातील सार्वजनिक कार्यक्रमांच्या योजनांना अंतिम रूप देईल. ११ सदस्यीय समितीचे अध्यक्ष संस्कृती विभागाचे प्रधान सचिव विकास खारगे आहेत आणि त्यामध्ये पोलीस महासंचालक, शहर आणि नागपूरचे पोलीस आयुक्तांसह नोकरशहा आणि वरिष्ठ पोलीस अधिकारी यांचा समावेश आहे.

सांस्कृतिक कार्य मंत्री सुधीर मुनगंटीवार यांनी वाघ नखं नोव्हेंबरमध्ये आणणार असल्याचे सांगितले आहे. मुनगंटीवार इंग्लंडला जातील आणि व्ही अँड ए म्युझियमसह सामंजस्य करारावर स्वाक्षरी करतील. यापूर्वी मुनगंटीवार म्हणाले होते की मुख्यमंत्री एकनाथ शिंदे हे देखील  इंग्लंडला जाणार आहेत. मात्र शिंदे यांनी अलीकडेच त्यांचा यूके आणि जर्मनीचा आठवडाभराचा नियोजित दौरा रद्द केला.

छत्रपती शिवाजी महाराजांच्या अफझलखानावर विजयाची कहाणी प्रसिद्ध आहे. त्यामुळे आम्हाला आनंद होत आहे की वाघ नखं ३५० व्या वर्धापन दिनाच्या कार्यक्रमांचा एक भाग म्हणून भारतात परततील. आम्हाला आशा आहे की त्यांच्या प्रदर्शनामुळे त्यांच्या इतिहासात नवीन संशोधन देखील शक्य होईल, असे अधिकाऱ्यांनी स्पष्ट केले.