गुन्हे
साईबाबांच्या शिर्डीत वाढलेल्या अवैध धंद्यांवर पोलिसांची कारवाई; धाडीत तब्बल २१ किलोंचा गांजा जप्त
शिर्डी गुन्हेवार्ता : साईबाबांची नगरी असलेल्या शिर्डीमध्ये अवैध धंदे वाढत असून या अवैध धंद्यांना आळा घालण्यासाठी शिर्डी पोलीस पुढाकार घेताना दिसत आहे. शुक्रवारी रात्री शिर्डी पोलिसांनी धडक कारवाई करत तीन लाख रुपये किंमतीचा तब्बल २१ किलो गांजा जप्त केला आहे. शिर्डी पोलिसांच्या या कारवाईमुळे अवैध धंदे करणाऱ्यांचे चांगलेच धाबे दणाणले आहे.
याबाबत अधिक माहिती अशी की, शिर्डीचे पोलीस उपाधीक्षक संदीप मिटके यांना गोपनीय बातमीदारामार्फत खात्रीशीर माहिती मिळाली की, शिर्डी येथील हेलिपॅड रोडवरील चांगदेव कोते यांच्या खोलीमध्ये अवैध विक्री करता आणलेला गांजाचा मोठ्या प्रमाणात साठा करण्यात आलेला आहे. प्राप्त माहितीच्या आधारे हेलिपॅड रोडवरील चांगदेव कोते यांच्या खोलीमध्ये पोलीस पथकाने पंचा समक्ष छापा टाकला असता त्या ठिकाणी दोन लाख नव्वदहजार रुपये किमतीचा २० किलो ८०० ग्राम गांजा मिळून आला. त्यासोबतच घटनास्थळावर वजन काटा, प्लास्टिकच्या पिशव्या, खाकी रंगाची चिकट टेप, कटर हे साहित्य देखील मिळून आले.
घटनास्थळावरून चांगदेव कोते यास ताब्यात घेण्यात आले असून दत्तात्रय बाबुराव करपे ,अनिता दत्तात्रय करपे ,शुभम दत्तात्रय करपे हे तीन आरोपी फरार आहेत. या आरोपिंविरुद्ध एनडीपीएस कायदा कलम २० ब नुसार गुन्हा दाखल करण्यात आला आहे. सदरची कारवाई जिल्हा पोलीस अधीक्षक राकेश ओला,अप्पर पोलीस अधीक्षक स्वाती भोर, यांच्या मार्गदर्शनाखाली पोलीस उपअधीक्षक संदीप मिटके पीआय नंदकुमार दुधाळ, एपीआय प्रवीण दातरे, पोलीस कॉन्स्टेबल बिरदवडे , गोंधे, भारमल , गोलवड यांच्या पथकाने केली आहे.
पोलिसांच्या या कारवाईचे नागरिकांमधून कौतुक होत आहे. शिर्डीमध्ये आजही अवैध दारू विक्री, जुगार अड्डे, गुटखा विक्री असे अनेक अवैध धंदे सुरू असून तरुण पिढी यामध्ये बरबाद होत आहे. शिर्डी पोलिसांनी सातत्याने अशा प्रकारच्या कारवाया करून अवैध धंदे करणाऱ्यांवर जरब बसवण्यासाठी कायमस्वरूपी बंदोबस्त करावा अशी मागणी नागरिकांकडून केली जात आहे.
