डोंबिवली : डोंबिवली पश्चिम महात्मा गांधी रस्त्यावरील भावे सभागृहाजवळून पायी जात असताना एका ७० वर्षाच्या महिलेला एका तरुणाने बुधवारी दुपारी ढकलून दिले. महिला रेल्वे जिन्यावर पडताच तिच्या गळ्यातील ६० हजार रुपये किमतीचा सोन्याचा ऐवज तरुणाने लांबिवला.
सुवर्णा अनिल नेवगी (७०) असे तक्रारदार महिलेचे नाव आहे. त्या डोंबिवली पूर्वेतील पेंडसेनगर भागात राहतात. बुधवारी दुपारी त्या डोंबिवली पश्चिमेत बाजारात खरेदीसाठी आल्या होत्या. त्या गणेश मंदिराजवळील रेल्वे पुलावरुन पश्चिम भागात आल्या होत्या. खरेदीनंतर त्या पुन्हा भावे सभागृहाजवळून रेल्वे पुलावरुन पूर्व भागात घरी चालल्या होत्या.
रेल्वेचा जिना चढत असताना अचानक पाठीमागून आरोपी नितीन पांडुरंग ठाकरे (२६, रा. दुगाड, भिवंडी) आला. त्याने सुवर्णा यांना पाठीमागून जोराने ढकलून दिले. त्या जिन्यावर पडल्या. जिन्याच्या पायऱ्यांची लोखंडी धारदार टोके त्यांच्या पायाला, मानेला लागल्याने त्यांना दुखापत झाली आहे. जिन्यावर पडताच आरोपी नितीनने त्यांच्या गळ्यातील १५ ग्रॅम वजनाचा सोन्याचा ऐवज लांबविला. विष्णुनगर पोलीस ठाण्यात सुवर्णा नेवगी यांनी तक्रार केली आहे. पोलीस उपनिरीक्षक ए. के. आंधळे तपास करत आहेत.
